НҰР-СҰЛТАН, 17 қыркүйек — Sputnik. Қазақстандық белгілі диджей Imanbek (Иманбек Зейкенов) әйгілі GQ "Men of the year 2021" ерлер журналының "Жыл жаңалығы" номинациясы бойынша премияға ие болды.
Бұған дейін Иманбек әлеуметтік желіде өзіне дауыс беруге үндеген. "Кәне, оларға не істей алатынымызды көрсетейікші", - деп жазды ол өз парақшасында.
GQ журналы түрлі номинация бойынша жеңіске жеткендер тізімін жариялады.
"Grammy сыйлығы, түрлі аудиоплатформалардағы миллиардтаған тыңдарман мен әлемдік музыкалық компаниялар және лейблдармен келісімшарт. Биыл барлық жерден естілген рэпер SAINt JHN-нің Roses трекін жасаушы қазақстандық жас диджей мен продюсер Иманбек Зейкенов үшін бұл үлкен істің басы ғана деген сенімдеміз", - деп жазды GQ.
Бұл номинация бойынша Иманбекке қарсылас болғандар - ресейлік актерлер Евгений Сангаджиев, Владимир Онохов, Федор Федотов, сондай-ақ рэп-орындаушы Soda Luv.
Иманбек GQ сыйлығына үміткер жалғыз қазақстандық емес. Белгілі стендап-комик Евгений Чебатков "Экрандағы бейне" номинациясында бақ сынап көрді. Алайда сыйлық актер және видеоблогер Антон Лапенкоға бұйырды.
Белгілі рэпер Скриптонит "Жыл музыканты" номинациясына қатысты, алайда оны музыкант Feduk еншіледі.
"Жыл продюсері" номинациясынан үміткер Тимур Бекмамбетовтің де байқауда жолы болмады.
Оқи отырыңыз: