Жеңістің 80 жылдығына арналған велошеру Оралға жетті
15:48 15.04.2025 (жаңартылды: 15:51 15.04.2025)
© Photo : Генконсульство России в Уральске
Жазылу
Ресейдің бас консулы Алексей Грубый велошеру қатысушыларын қарсы алды
АСТАНА, 15 сәуір – Sputnik. Ұлы Жеңістің 80 жылдығына арналған велошеру Орал қаласына жетті, деп хабарлайды Sputnik Қазақстан Ресейдің бас консулдығына сілтеме жасап.
Велошеруге өзбектің танымал опера әншісі, саяхатшы Хурсанд Шеров бастамашы болды. Ал Қазақстанда оған жергілікті велотуристер Қайрат Ырғызбаев пен Жұмабай Отарғалиев қосылды. Жұмабай Отарғалиев биыл 70 жасқа келіп отыр.
Күні кеше велошабандоздар Орал қаласына жетті. Сол жерде Ресейдің бас консулы Алексей Грубыймен және вице-консул Константин Погарельскиймен де кездесіп үлгерді.
"Қазақстанның кең даласын оңтүстіктен солтүстікке дейін жүріп өткеннен кейін энтузиастар Ресей қалалары – Орынбор, Самара, Ульяновск, Пенза, Рязань, Тверь мен Волоколамск қалаларына бет алады. Велошеру 9 мамырда Мәскеу қаласында аяқталады", - дейді консулдық қызметкерлері.
Айта кетері, Мәскеуде өтетін парадға Қазақстан президенті Қасым-Жомарт Тоқаев та барады. Жақында мемлекет басшысының осы сапарына дайындық шаралары талқыланған болатын.
