НҰР-СҰЛТАН, 29 қыркүйек – Sputnik. Президент Қасым-Жомарт Тоқаев Surbana Jurong тобының бас директоры Вонг Хеанг Файнды қабылдады, деп хабарлады Ақорданың сайты.
Мемлекет басшысының сингапурлық Surbana Jurong компаниясының бас директоры Вонг Хеанг Файнмен кездесуінде Алматы агломерациясын дамытуға қатысты инвестициялық жобаларды жүзеге асырудың перспективалары талқыланды.
"Президентке компанияның Алматы облысындағы "G4 City" деп аталатын жаңа төрт қаланың құрылысын отандық инвесторлармен серіктесе отырып жүргізу жөніндегі жоспары таныстырылды", - делінген хабарламада.
Қазіргі уақытта "G4 City" құрылысының жобасын іске асыру жөніндегі жол картасы мен Мастер-жоспар әзірленген. Бұл Жол картасы қала құрылысының құжаттарын дайындау, инженерлік және әлеуметтік инфрақұрылым, қолайлы инвестициялық климат қалыптастыру мәселелерін қамтиды.
Қасым-Жомарт Тоқаев Сингапурмен инвестициялық ынтымақтастықты нығайтудың стратегиялық маңызына тоқталып, аталған жоба бойынша шетелдік серіктестерге мемлекет тарапынан қолдау көрсетілетіні туралы айтты.
Оқи отырыңыз:
- Президент Сағынтаевқа қаланы дамыту бойынша тапсырма берді
- Алматы облысында жеміс-жидек кластері салына бастады
- Сағынтаев спорт алаңдарын қандай өзгеріс күтіп тұрғанын айтты
