АСТАНА, 20 наурыз – Sputnik. Ресурс ұстаушы "Petroprox" ЖШС ай соңына дейін Алматы облысының шаруаларына дизельді отын жеткізуге уәде етті. Бұл туралы бүгін энергетика вице-министрі Мағзұм Мырзағалиев мәлімдеді, деп хабарлайды Sputnik Қазақстан тілшісі.
Отырыстан кейін журналистердің сауалына жауап берген энергетика вице-министрі ресурс ұстаушының өз міндеттемелерін неге орындамай отырғанын былай түсіндірді.
"Бірде бір ресурс ұстаушы дизельді отынды нарықта сата алатын бағадан төмен бағаға жеткізгісі келмейді. Мен баяндамамда айтып өттім: біз ресурс ұстаушылар үшін бағаны тоннасына 156 мың теңге немесе бір литріне 130 теңге деп белгіледік. Дегенмен ресурс ұстаушылар орташа есеппен алғанда отынның бір тоннасын 170 мың теңгемен сатып жатыр. Тиісінше 14 мың теңгені ешкім шығын ретінде алғысы келмейді", — деді Мырзағалиев.
Вице-министр "Petroprox" ЖШС-мен келіссөздер жүргенін, компания осы айдың соңына дейін міндеттемелерін орындауға уәде бергенін атап өтті.
Мырзағалиев биыл республика бойынша көктемгі егіс жұмыстарына қажетті 375 мың тонна дизельді отын өзіміздің МӨЗ-ден жеткізілетінін мәлімдеді.
"Ауыл шаруашылығы өндірушілеріне қажетті 375 мың тонна – бұл тек отандық отын. Яғни өзіміздің үш мұнай өңдеу зауытынан тиеледі. Тиісті квоталар бар, ауыл шаруашылығы министрлігімен бірлесіп өңірлерге отын жеткізу кестесін әзірлеп, бекіттік. Наурыз айынан бері жұмыс жүріп жатыр, қазір отынның 50 пайызы шаруаларға жеткізілді", — деді ол.
Вице-министр көктемгі дала жұмыстары кезінде жанар-жағармай бағасының күрт құбылуы байқалмағанын атап өтті.
"Біз жанар-жағармай бағасын реттемейміз. Баға сұраныс пен ұсынысқа байланысты қалыптасады. Бірақ әзірге бағаның күрт құбылуын байқап отырған жоқпыз", — деді министрдің орынбасары.
Айта кетсек, бүгін үкімет отырысында ауыл шаруашылығы вице-министрі Арман Евниев энергетика министрлігі Алматы облысына дизельді отын жеткізу мәселесін шеше алмай отырғанын айтты.
