АСТАНА, 26 ақпан – Sputnik. Сотталған жүргізуші Болат Молдағалиевтің туыстары мәлімдеме жасап, жазаны жеңілдетуді сұрады, деп хабарлайды Sputnik Қазақстан тілшісі.
Бүгін сотталған азаматтың туыстары арнайы баспасөз мәслихатын өткізіп, мәлімдеме жасады.
"Болаттың отбасы Әсел Рымхановаға көмектесу үшін барын салды. Бұл әдейі жасалған жоқ. Оның үстіне мен Болаттың 12 жасында шатырдан құлап, ауыр жарақат алғанын білемін. Мұны да назарға алу керек. Тәтесі КамАЗ-дың астына түсіп жол апатынан қаза тапқан еді. Сол кезде Болаттың отбасы ол жүргізушіден ештеңе талап еткен жоқ және оны жазалауға да тырыспады. Өйткені олар оның үлкен отбасы барын білді… Болат кінәсін мойындады, қиналып жүр. Айыппұл немесе басқа жолмен жазалауға болар еді, бірақ аталған жағдайда түрме бұл іске көмек емес", — деді ҚР Көркемөнер академиясының президенті Амандос Ақанаев Астанада өткен баспасөз мәслихатында.
Жүргізушінің анасы Мария Молдағалиеваның айтуынша, қоғамда Болат жайында біржақты теріс пікір қалыптасқан.
"Иә, менің ұлым кінәлі және оны мойындап отыр. Біз Рымхановтар отбасына көмегімізді ұсындық, бірақ олар бізбен кездескісі де келген жоқ. Рымханованың туыстары қолдарынан келгендерін аянып қалмады, анықтау бөлімінде берген жауабымды да бұрмалап таратып жіберді", — деді Молдағалиева.
"Маған Әселдің ағасы бұрынғы "финполшы" екенін айтты. Мұның іске не қатысы бар екенін сұрадым. Сауда-өнеркәсіп палатасында атқарған қызметіме қатысты сұрай бастады. Мен ол кезде вице-президент болған едім. "ҚазЭКСПО"-ның президентімін, бірақ мұның іске еш қатысы жоқ, бұл жекеменшік компания. Болатты "Үсенов-2" дейді, бірақ біз шенеунік емеспіз, жоғары мемлекеттік қызметте емеспіз", — дейді анасы.
Молдағалиева ұлының ұстамасы (эпилепсия) 2000 жылдардың басында байқалғанын айтты.
"Ұстамасы бар адамның неге көлік айдағаны бәріне қызық. Ұлымның ұстамасы бірден байқалған жоқ, 2000 жылдардың бас кезінде басталды. 2004 жылы Алматыда жер сілкінісі болған еді, ол кезде олар Қапшағайда суға түсіп жүрген. Сол уақытта алғаш рет ұстамасы ұстады. Кейін ол Алматыдағы эпилептология және неврология орталығына есепке тұрып, ем ала бастадды. Эпилепсия 24 сағат бойы мазалайтын ауру емес, оның қашан болатынын ешкім білмейді. Екі жылда, бес немесе он жылда қайталануы мүмкін. Алматыда тұрғанда ұлымның ұстамасы жиі ұстап қалатын. Кейін эпилепорталықтың дәрігерлері оған Алматыдан кетуге кеңес берді. Өйткені Алматы таулы, сейсмикалық аймақ. Сөйтіп Болат 2011 жылы Астанаға қоныс аударды", — деді ол.
"Кейін куәліктің мерзімі аяқталғанда, оны ауыстырып жүрді. Барлық тексерістен жақсы өтетін. Эпилепсия психикалық, кардиологиялық ауру емес, бір рет ұстамасы ұстаса, кейін қашан қайталанатынын болжау қиын. Бірақ менің ұлым бар жауапкершілікті өз мойнына алып отыр", — деді ол.
