АСТАНА, 30 қаңтар — Sputnik. Қазіргі таңда, қазақстандық спортшылар тоғыз спорт түрінен 57 олимпиадалық лицензия алды, деп хабарлайды Ұлттық олимпиадалық комитеттің сайты.
Қазақстан құрамасында ең көп жолдама алған биатлоншылар болды — 10 (бес еркек, бес әйел). Командаға енген спортшылар: Василий Подкорытов, Максим Браун, Владислав Витенко, Тимур Хамитгатин, Роман Еремин, Алина Райкова, Дарья Климина, Галина Вишневская, Ольга Полторанина және Елизавета Бельченко. Қысқы Олимпиада ойындарында биатлоннан өтетін жарыстар: спринт, ізге түсу, жекелей сайыс, масс-старт, аралас эстафета және эстафета.
Фристайлдан ел намысын 9 спортшы қорғайды (үш еркек, алты әйел). Могул сайысында Дмитрий Рейхерд, Павел Колмаков, Юлия Галышева және Аяулым Әмренова өнер көрсетеді. Акробатикада жарыс жолына Маржан Ақжігіт, Жанбота Алдабергенова, Аяна Жолдас, Ақмаржан Қалмұрзаева және Ильдар Бадрутдинов шығады.
Шаңғы жарысында жеті спортшымыз тізімге ілінді (төрт еркек, үш әйел). Алексей Полторанин, Денис Волотка, Евгений Величко, Виталий Пухкало, Валерия Тюленева, Анна Шевченко мен Елена Коломина Пхенчханда медальға тартысады.
Шорт-тректен Қазақстан құрамасы жеті спортшыны Олимпиадаға апарады (бес еркек, екі әйел). Олар — Нұрберген Жұмағазиев, Абзал Әжғәлиев, Денис Никиша, Еркебұлан Шамуханов, Мерсаид Жақсыбаев, Анастасия Крестова мен А Йонг Ким.
Коньки тебуден Каннындағы мұз айдынға алты спортшымыз шығады (бес еркек, бір әйел). Бұл спорт түрінен ел намысын қорғайтын спортшылар: Роман Креч (500, 1000 м), Станислав Палкин (500, 1000, 1500 м), Артем Крикунов (500 м), Федор Мезенцев (1000, 1500 м, масс-старт), Денис Кузин (1000, 1500 м) және Екатерина Айдова (500, 1000, 1500 м).
Мәнерлеп сырғанаудан қазақстандық үш спортшымыз сайысқа түседі (бір еркек, екі әйел). Денис Тен, Элизабет Тұрсынбаева мен Айза Имамбек өз өнерлерін әлемге паш етпек.
Тау шаңғы спортынан Қазақстан екі спортшыны тіркеді (еркек, әйел). Олар Игорь Закурдаев пен Мария Григорьева.
Шана спорты мен трамплиннен секіруден екі спортшымыз өнер көрсетеді. Ел намысын Пхенчханда Никита Копыренко (шана спорты) мен Сергей Ткаченко (трамплиннен секіру) қорғамақ.
Естеріңізге сала кетсек, Пхенчхандағы қысқа Олимпиада ойындары ақпанның 9-25 аралығында өтеді. Олимпиаданың ашылу салтанатында ел туын шорт-трекші Абзал Әжғәлиев ұстап шығады.
