АСТАНА, 11 мамыр — Sputnik. Қостанай облысындағы ауылда Раушан Қожамқұлова үш баласы және күйеуімен бірге бұрынғы мәйітхана ғимаратында тұрып жатыр. Отбасының жағдайы туралы жергілікті тұрғындар "Костанайские новости" басылымына хабарлаған.
"Өлік бұзылғанда пайда болатын у бар емес пе, ол жылдар бойы сақталады ғой", — дейді отбасыға жаны ашыған қостанайлықтар.
Қазір үш балалы отбасы тұрып жатқан мәйітхана бірнеше жыл бұрын жабылып қалған. Одан кейін ғимаратта стоматология орталығы жұмыс істепті.
Раушан Қожамқұлованың айтуынша, отбасындағы қаржылық қиындықтарға байланысты күйеуі екеуі осы жерге тұруға мәжбүр болған.
"Бірінші әпкем келіп орналасты, ол ғимараттың екінші бөлігінде тұрады, — дейді әйел. — Ол жақ жөнделген, біршама жақсы. Қаржы жағынан қысылғанымызда, әпкем қожайынмен бізді тұрғызуға келісті. Басы артық ештеңе төлеп отырған жоқпыз, жарық пен газ ғана".
Раушанның отбасы баспана алу үшін кезекке тұрғанына біраз болды, бірақ әлі қол жеткізе алмай келеді.
"Кейде қорқамыз… Дегенмен мәйітхана баяғыда жабылған. Содан соң стоматология орталығы жұмыс істеді. Талай рет дезинфекция жасаған шығар. Сондықтан мәйітхана болған жерге мүлдем ұқсамайды. Бұл үйге көңіліміз толады, мектеп жақын, балаларға да қолайлы", — дейді Раушан.
Әйелдің айтуынша, жақын арада Заречное ауылына көшпек ойлары бар екен. Раушан ешкімнен материалдық көмек күтпейтінін де атап өтті.
