АСТАНА, 3 қараша – Sputnik. Ит жетектеген әйелге қару кезенген ер адам жауапқа тартылды, деп хабарлады Қостанай қалалық сотының баспасөз қызметі.
Қоғамдық орында пневматикалық қаруды қолданамын деп қорқытуға байланысты әкімшілік құқық бұзушылық туралы істі Қостанай қаласының әкімшілік құқық бұзушылықтар жөніндегі мамандандырылған соты қарады.
Сот талқылауы барысында анықталғандай, оқиға 2025 жылдың 27 қарашасында шамамен 21:40-та Қостанай қаласында болған.
"Ер адам алкогольдік мас күйінде пневматикалық қаруды сермеп, оны қолданамын деп азаматтарды қорқытқан. Сонымен қатар ол қоғамдық орында бейәдеп сөздер айтып, айналасындағыларға құрметсіздік танытып, қоғамдық тәртіп пен азаматтардың тыныштығын бұзған", - деп жазылған хабарламада.
Айыпталушы өз сөзінде қаруды үйдің кіреберісінен тауып алғанын, оны көтеріп, ит пен оның иесін көрген кезде өзін-өзі қорғау мақсатында олардың жағына бағыттағанын айтқан.
Әйелдің айтуынша, ол итпен бірге сыртқа шыққан кезде оның артынан қолында қаруы бар көршісі шығып, қаруды бірден оның жағына бағыттаған. Әйел қаруды тартып алмақ болған, алайда көршісі қарсыласқан. Оның айқайын естіген туыстары сыртқа жүгіріп шығып, олардың бірі ер адамның қолынан қаруды жұлып алған.
Сот талқылауының қорытындысы бойынша сот ер адамға 5 тәулік мерзімге әкімшілік қамау жазасын тағайындады.
Сот қаулысы заңды күшіне енген жоқ.