АСТАНА, 16 қыркүйек – Sputnik. Президент Қасым-Жомарт Тоқаев элеваторларды жаңғырту үшін жеңілдетілген қаржыландырудың арнайы бағдарламасын іске қосуға тапсырма берді, деп хабарлайды Sputnik Қазақстан.
Мемлекет басшысы бүгін Зерендіде егін жинау науқанына арналған кеңес өткізіп, жиналған өнімді тиісінше сақтаудың маңыздылығына тоқталды. Сбебі мұндай орындардың тапшылығы байқалады.
"Заманауи элеваторларды салуға және оларды ұстап тұруға қомақты инвестиция қажет екені анық. Сондықтан элеваторларды жаңғырту үшін жеңілдетілген қаржыландырудың арнайы бағдарламасын іске қосу керек", - деді Тоқаев.
Оның айтуынша, сапалы тұқым дайындауға баса назар аударған жөн. Бұдан бөлек, отандық нарықты өзімізде шығарылған тұқыммен қамтамасыз етудің нақты қадамдары керек.
"Былтырдан бастап жетілдірілген минералды тыңайтқыштарды субсидиялау тетігі тиімділігін көрсетті. Ауыл шаруашылығы министрлігінің алдында тұқым өндірісі бойынша мемлекеттік қолдаудың баламалы шараларын енгізу міндеті тұр. Жалпы, егін шаруашылығында жақсы нәтижеге қол жеткізгенімізді атап өткен дұрыс. Бұл ауыл шаруашылығының аралас салаларына оң әсер етіп отыр", – деді президент.
Айта кетері, жиынға Қостанай, Павлодар және Солтүстік Қазақстан облысының диқандары бейнебайланыс арқылы қосылды.