АСТАНА, 1 тамыз – Sputnik. Ақтөбе облысында бөгеттің бұзылуына кінәлі әкімдік қызметкері сотталды, деп хабарлайды Sputnik Қазақстан Қаржылық мониторинг агенттігіне сілтеме жасап.
Былтыр көктемгі су тасқыны кезінде Хромтау ауданындағы "Магаджан" бөгетін су шайып кетті. Соның салдарынан Алға ауданының елді мекендері, сондай-ақ Елек және Қарғалы өзендерінің маңындағы бау-бақша ұжымдары су астында қалды. 215 адам, соның ішінде 96 бала қауіпсіз жерге эвакуацияланған болатын.
Тергеу материалына сәйкес, бөгеттің бұзылуына жергілікті атқарушы орган қызметкерінің өз міндеттерін тиісінше орындамауы себеп болды. Ол гидротехникалық құрылыстың техникалық жағдайын бақыламаған, тексеріс жүргізбеген және апаттың алдын алуға қажетті шаралар қабылдамаған. Бөгеттің бұзылуынан 211 млн теңгеден астам шығын келді.
Сот әкімдік қызметкеріне 1 жыл 6 ай мерзімге бостандығын шектеу жазасын кесті. Үкім заңды күшіне енген жоқ.