АСТАНА, 28 шілде – Sputnik. Қазақстандықтар біржолғы зейнетақы төлемдерінің басым бөлігін тұрғын үй жағдайын жақсартуға және емделуге жұмсаған, деп хабарлайды Sputnik Қазақстан.
1 шілдедегі жағдай бойынша зейнетақы жинақтарының жалпы көлемі 24 трлн теңгеден асты:
міндетті зейнетақы жарналары - 22,85 трлн теңге;
міндетті кәсіптік зейнетақы жарналары - 683,10 млрд теңге;
ерікті зейнетақы жарналары - 8,73 млрд теңге;
жұмыс берушінің міндетті зейнетақы жарналары - 463,98 млрд теңге.
Осылайша, бір жылдың ішінде қазақстандықтардың зейнетақы жинақтары 4 трлн теңгеге немесе 20,9 процентке өсті.
"Ал жыл басынан бері салымшылардың шоттарына есептелген таза инвестициялық табыс шамамен 350,7 млрд теңгеге жетіп, алдыңғы айлардағы табыстың уақытша төмендеуін тоқтатты", - дейді қор мамандары.
Сонымен қатар қазақстандықтар біржолғы зейнетақы төлемдерінің басым бөлігін тұрғын үй жағдайын жақсартуға және емделуге жұмсағаны белгілі болды. Осы мақсаттарға барлығы 451,58 млрд теңге аударылды.
Басқа да төлемдер:
зейнет жасына толуына байланысты төлемдер - 118,79 млрд теңге;
мұрагерлік бойынша төлемдер - 34,58 млрд теңге;
Қазақстаннан тыс жерге тұрақты тұруға кетуге байланысты төлемдер 19,18 млрд теңге;
мүгедектігі бар адамдарға – 1,58 млрд теңге;
жерлеуге – 5,36 млрд теңге;
сақтандыру ұйымдарына - 151,78 млрд теңге.
"БЖЗҚ-дан жарналардың барлық түрі бойынша жасалған төлемдер мен сақтандыру ұйымдарына аударымдар 782,87 млрд теңгені құрады. Бұл былтыр жасалған төлемдерден 325,24 млрд теңгеге (немесе 71,1%) көп", - делінген ресми хабарламада.
Айта кетері, бұған дейін қор мамандары шот ашқан адам қайтыс болған жағдайда зейнетақы және мақсатты жинақтар мұра ретінде қалай берілетінін түсіндірген.