АСТАНА, 24 шілде – Sputnik. Қазақстандық полицейлер бір айдың ішінде іздеуде жүрген 67 адамды ұстады. Олардың арасында ауыр қылмыс жасаған шетелдіктер де бар, деп хабарлайды Sputnik Қазақстан Polisia.kz порталына сілтеме жасап.
Жақында Алматы қаласының әуежайында халықаралық іздеуде жүрген Қытай азаматы ұсталды. Ол өткен жылдың желтоқсан айында Бахрейн Корольдігінде жеке үйге заңсыз кіріп, құны 535 629 АҚШ долларын (шамамен, 300 млн теңге) құрайтын зергерлік бұйымдардың коллекциясын ұрлап кеткен.
"Бахрейннен қашып үлгерген қытайлыққа халықаралық іздеу жарияланды. Ал оған қатысты шұғыл ақпарат Қазақстанның құқық қорғау органдарына түскен болатын. Соның негізінде шетелде пәтерді тонаған ер адам ұсталды", - деп жазылған хабарламада.
Бұдан бөлек, Қазақстанның ішкі істер министрлігінің сұрауы бойынша Түркияда 40 жастағы Әзербайжан азаматы ұсталды. Ол 2017 жылдың қыркүйек айында Алматы қаласында қылмыстық топ құрамында донорлық органды заңсыз алып, сатуға қатысқан.
Қазіргі кезде сотқа дейінгі тергеу шаралары басталды. Халықаралық ынтымақтастық аясында қылмыс жасағандарды экстрадициялау мәселесі пысықталады.
Айта кетері, шілде айында Ішкі істер министрлігі іздеуде жүрген 67 адамды ұстады. Олардың ішінде адам өлтірген, қарақшылық шабуыл жасаған, қасақана ауыр дене жарақатын келтірген, тонау мен бопсалау үшін айыпталғандар бар. Сонымен қатар із-түзсіз жоғалған 190 азаматтың орналасқан жері анықталды.