АСТАНА, 28 наурыз – Sputnik. Ішкі істер министрінің орынбасары Игорь Лепеха Мәскеу түбіндегі терактіден кейін қауіпсіздік мақсатында елімізде қолға алынып жатқан шаралар туралы айтты, деп хабарлайды Sputnik Қазақстан тілшісі.
Айтуынша, ІІМ террористік тұрғыдан осал нысандарға қосымша тексеріс жүргізеді. Олардың арасында аумағы 500 шаршы метрден асатын концерт залдары, сауда орталықтары, сонымен қатр білім және денсаулық сақтау нысандары, халық көп жиналатын орындар бар.
"Қазір біз осы нысандардың барлығына қосымша тексеріс жүргізбекшіміз. Бұрын тексерілген, ұйғарым берілген нысандарды қайта тексереміз. Меншік иелерімен әңгімелесеміз, нығайту мәселелерін қараймыз, ұсыныстар береміз. Бұл бағытта жұмыс жүріп жатыр", - деп сендірді Лепеха сенат кулуарында.
Осы орайда ол биыл қаңтар айынан бастап шетелдіктер үшін міндетті дактилоскопия күшіне енгенін еске салды. Айтуынша, саусақ іздерін тапсыру арқасында жыл басынан бері елге кірмек болған 10 қылмыскер анықталған.
Сондай-ақ ІІМ басшысының орынбасары қазақстандықтарға кеңес берді. Айтуынша, лаңкестер басып алған жағдайда байбаламға салынбай, оқиға орнынан бой тасалап, қашып кетуге тырысу қажет.
Естеріңізге сала кетейік, 22 наурызда Мәскеу маңындағы Красногорск қаласындағы "Крокус Сити холлда" бетперде киген белгісіз адамдар концерт алдында көрермендерге оқ атты.
Теракт салдарынан қаза болғандар саны 140 адамнан асты.
Ресей президенті Владимир Путин 24 наурызды жалпыұлттық аза тұту күні деп жариялады.