АЛМАТЫ, 15 қараша – Sputnik. Алматыда 15 000 үй жануары чиптеледі, деп хабарлайды қалалық әкімдіктің баспасөз қызметі.
Алматыда 1 қарашадан 20 желтоқсанға дейін үй жануарларын тегін чиптеу және тіркеу бағдарламасы жүріп жатыр.
1 қыркүйектен бастап ит-мысықты чиптеу міндетті. Ал үй жануарларының басқа түрлерін — сәндік егеуқұйрықтар, аламан немесе ергежейлі шошқаларды тіркеу әркімнің өз еркінде. Жалпы бұл жүйеге жануар туралы ақпаратты енгізу қазақстандықтар үшін тегін, алайда чип орнату, белгі салу немесе басқа да процедураларды жануар иесі өз қалтасынан төлеуі керек. Мұндай ветеринариялық қызметтерді төлеуге мүмкіндігі жоқ азаматтардың әлеуметтік осал санаттары үшін ғана ерекше жағдай қарастырылған.
"Үй жануарлары есепке алынса оларды жоғалтқан немесе ұрлаған кезде оңай анықтауға болады. Бұл иесіз жануарларды азайтуға және оларды ұстау жағдайын жақсартуға көмектеседі. Бағдарлама аясында 15 мың ит пен мысықты чиптеу және тіркеу көзделген", - дейді ведомство.
Экология және табиғи ресурстар министрлігі орман шаруашылығы және жануарлар дүниесі комитетінің мәліметінше, былтыр қыркүйек айының соңында Қазақстанда 730,7 мың ит пен мысық тіркелген. Оның 83%-тен астамы яғни, 610 мыңы – үй жануарлары мен қызметтік иттер. Ал 16,5%-і немесе 120,5 мыңы қаңғыбас жануарлар екен.
Сондай-ақ жануарлар дүниесі комитетінің мәліметінше, былтыр тоғыз айда қалаларда 178,3 мың ит пен мысық ауланған, олардың көпшілігі – қаңғыбас жануарлар. Оның ішінде жануарлардың 134,4 мыңы өлтірілген. Небәрі 2,7%-і яғни,4,8 мың қаңғыбас жануар егіліп, зарарсыздандырылып, босатылған.