АСТАНА, 14 қараша – Sputnik. Шымкентте жергілікті кәсіпкерлерді бопсалап, автокөліктерін тартып алған қылмыстық топ ұсталды, деп хабарлайды Polisia.kz.
Қалалық полиция департаменті ұйымдасқан қылмысқа қарсы күрес басқармасының қызметкерлері арнайы операция барысында бопсалаушылар тобын құрықтады. Топ мүшелері – 20-40 жас аралығындағы азаматтар. Олардың басым бөлігі бұрын бірнеше рет қылмыстық жауапқа тартылған.
"Ұсталғандар ұзақ уақыт бойы жергілікті екі кәсіпкерден қоқан-лоқы көрсету және күш қолдану арқылы ақша бопсалап, BMW мен ВА3-2114 автокөліктерін заңсыз иемденіп алған. Тексеру кезінде төрт атыс қаруы, оқ-дәрі, есірткі және өзге де заттай айғақтар тәркіленді", - делінген хабарламада.
Полицияға 10 адам жеткізілді, соның ішінде топтың ең белсенді төрт мүшесі қамауға алынды.
Қазір Қылмыстық кодекстің бірнеше бабы бойынша сотқа дейінгі тергеу жүргізіліп жатыр.