АСТАНА, 22 тамыз – Sputnik. Сырдария өзеніне батып кеткен адамдардың отбасыларына барлық қажетті көмек көрсетіледі, деп хабарлайды Sputnik Қазақстан Түркістан облыстық әкімдігіне сілтеме жасап.
Қайғылы жағдай 21 тамызда кешкі сағат 18:00-дің кезінде Отырар ауданындағы Сырдария өзенінен өтетін көпір маңында болған. Шомылуға барған 20 адамның 11-і суға батып кеткен. Оның 5-еуі балалар болса, 6-ауы – ересектер. Барлығы тыйым салынған жерде шомылған.
© Photo : Акимат Туркестанской области
Соңғы ақпаратқа сәйкес, суға кеткен 11 адамның сегізінің денесі табылды. Іздестіріліп жатқан үш адамның екеуі – жасөспірімдер. Суға батып кеткендердің барлығы – Көксарай ауылында тұратын бір әулеттің адамдары.
Жергілікті тұрғындардың айтуынша, қайғылы жағдай болған жерде судың ағысы қатты. Ал жағада саз бен балшық көп.
Туыстар тойдан шыққан соң демалу үшін өзен жағасына тоқтаған. Қайтыс болған адамдар суға түсіп те үлгермеген. Алдын ала мәлімет бойынша бір адам сүрініп суға құлаған соң өзгелері оны құтқарып қалғысы келген. Алайда олар да батып кеткен.
11 человек утонули в реке Сырдарья
© Photo : Акимат Туркестанской области
"Құтқарушылар мен еріктілер тұрғындарға жаз бойы бұл жерге түсуге болмайтыны туралы жан-жақты ескерту жұмыстарын жүргізген. Анықталғандай, мұндай түсіндіру жұмыстарына дәл осы әулет те қатысқан. Алайда рұқсат етілмеген орында шомылудың зардабы мен сақтық шараларын ескермеудің салдары осындай жағдайға ұласып отыр", - дейді әкімдік мамандары.
Қазіргі кезде оқиға орнында жүздеген құтқарушы жүр. Әкімдіктің жанынан арнайы штаб құрылды. Жедел желінің телефоны: 8-7253-357881.
Әкімдік атап өткендей, суға батып кеткен адамдардың отбасыларына барлық қажетті көмек көрсетіледі.