АСТАНА, 14 қаңтар – Sputnik. Астанада соңғы күндері жауған қалың қарға қарамастан, елорданың коммуналдық қызметтері күшейтілген режимде жұмысын жалғастырып жатыр. Қыс мезгілі басталғалы қаладан 1,9 миллион текше метрден астам қар шығарылды, деп хабарлайды Астана әкімдігінің ресми сайты.
Сенбі күні таңертеңнен бері қаладағы қар тазалау жұмыстарына 2 мыңнан астам жол қызметкері мен 1200-ден астам арнайы техника жұмылдырылды.
Өткен түнде қаладан 42 мың текше метрден астам қар шығарылып, ол үшін полигондарға 3038 рейс жасалды.
Жалпы, қысқы мезгілі басталғалы бері қар полигондарына 1,9 миллион текше метрден астам қар жеткізілді. Бұл 152 748 ауыр жүк көлігінің көлеміне тең.
Сондай-ақ, тұрғындардың ыңғайлы жүріп-тұруы үшін қаладағы көлік жолдары мен тротуарларға жүйелі түрде құм-тұз қоспалары төгіліп жатыр.