НҰР-СҰЛТАН, 3 маусым – Sputnik. Мемлекет басшысы Қасым-Жомарт Тоқаев республикалық референдумға байланысты халыққа бейнеүндеу жолдады, деп хабарлайды Sputnik Қазақстан тілшісі.
"Алдағы референдум мемлекетімізді нығайтуға және қоғамды тың серпінмен дамытуға жол ашады. Мен әрбір азаматымызды ел тағдырын айқындайтын тарихи таңдау жасауға шақырамын. Бұл референдумда әр азаматтың дауысы – маңызды. Әрбір азамат тұтас ұлттың тағдырына, яғни тікелей өз тағдырына оң ықпал ете алады. Ендеше, 5 маусым күні өз таңдауымызды жасайық! Жаңа Қазақстанды бәріміз бірге құрайық", - деді Тоқаев.
Айта кетері, 5 маусымда конституциялық өзгерістер бойынша республикалық референдум өтеді. Бүгінде барлық жерде дауыс беру учаскесі жасақталды. Қазақстандықтар бюллетеньде "иә" немесе "жоқ" деп, өз таңдауын жасайды.