НҰР-СҰЛТАН, 14 мамыр — Sputnik. Қазақстан премьер-министрі Әлихан Смайылов Ақтөбе облысының билігіне нәресте өлімін азайтуды тапсырды.
Өңірге келгеннен кейін үкімет басшысы 2021 жылы пайдалануға берілген 190 жатын орынға арналған жаңа облыстық перинаталдық орталықтың жұмысымен танысты.
"Өткен жылдың қорытындысы бойынша облыста нәресте өлімі 29%-ке, қан айналымы жүйесі ауруларынан болатын өлім 47%-ке артқан. Әкімдік жаңа перинаталдық орталықтың мүмкіндіктерін пайдалана отырып, жаңа туған бала өлімін азайту бойынша шаралар қабылдауы қажет. Сондай-ақ медицина кадрларының тапшылығын азайту бойынша да жүйелі жұмыс жүргізу керек", - деді Әлихан Смайылов.
Сонымен қатар Смайылов өңірдегі білім беруді дамыту мәселелерін де қозғады.
Үкіметтің баспасөз қызметі ұсынған дерек бойынша, биыл мектеп құрылысына республикалық бюджеттен 104 миллиард теңге бөлініп, республика бойынша 1 мыңнан астам мектепті, оның ішінде Ақтөбе облысында 56 мектепті жаңғырту жоспарланып отыр.
"Өңірде үш апатты және бес үш ауысымды мектеп бар. Сонымен қатар, балабақша кезегі де үлкен екені байқалады – кезекте 12 мыңға жуық бала тұр. Бұл проблеманы шешу үшін жыл соңына дейін 25 балабақша мен 11 жаңа мектеп ашу қажет" - деді премьер.
Ол өңір басшылығы колледждерде дуалды оқытуды дамытуға назар аударып, түлектердің жұмысқа орналасуына белсенді ықпал ету қажеттілігін атап өтті.
Премьер-министр жұмыс сапары кезінде жылдық қуаты 70 мың тоннаға дейін жететін ИП "Бектұрова" сауда-логистикалық орталығына барды.
Үкімет басшысы маусымаралық кезеңде азық-түліктің тапшылығы азық-түлік бағасының көтерілуіне ықпал етіп отырған факторлардың бірі екенін, сондықтан сақтау және логистикалық орталықтар бағаны тұрақтандырудың тиімді құралы болып отырғанын айтты.
Осы орталықтардың арқасында ауыл шаруашылығы өнімдерін дүкен сөрелеріне делдалсыз жеткізу мүмкін болып отыр.
Әлихан Смайылов облыс басшылығына ауыл шаруашылығы тауарын өндірушілермен дер кезінде форвардтық келісімшарт жасап, "өндірушіден тұтынушыға дейін" тиімді сату тізбегін құруды тапсырды.
Бұған дейін хабарлағанымыздай, Әлихан Смайылов Ақтөбе облысында мұнай өнеркәсібі саласындағы жұмысшылардың жалақысын көтеру мәселесін қарастыруды тапсырды.