НҰР-СҰЛТАН, 4 қараша – Sputnik. Қарағанды облысының Саран қаласында шина шығаратын зауыт жобасын премьер-министр Асқар Мамин ресейлік "Татнефть" мұнай компаниясының бас директоры Наиль Магановпен талқылады, деп хабарлайды үкіметтің баспасөз қызметі.
Тараптар автомобиль шинасын шығару нысанын инфрақұрылыммен қамтамасыз ету мен жоспар-кестесін келісуге дайындық жобасының жұмыстарын пысықтады.
"Қазақстанда ішкі нарық қажеттіліктерін өтеу мен экспорттық әлеуетті дамытуда аталған шина шығаратын зауыт құрылысының маңызы зор", – деді Мамин.
Қыркүйек айында Қостанайда кездескен Асқар Мамин мен Татарстан президенті Рустам Минниханов жобаны іске асыруға қол қойған болатын. Сол жерде Қарағанды облысының әкімдігі мен "Татнефть" арасындағы инвестициялық меморандум да бекітілген.
Зауыт жеңіл көліктерге арналған 3 миллион шина мен коммерциялық көлік пен автобустардың 500 мың дана шина шығаратындай әлеуетке ие.
Оқи отырыңыз: 2025 жылға қарай халық толықтай ауыз сумен қамтылады – Мамин
Мыңнан астам жаңа жұмыс орны ашылатын нысанға құйылған инвестициялардың жалпы көлемі шамамен 111 миллиард теңгені құрайды.
Зауыт пайдалануға 2022 жылы беріледі деп жоспарланған.