АСТАНА, 15 қаңтар — Sputnik. Ақтөбеде бірнеше мектеп оқушылары арасындағы кикілжің жаппай төбелеске ұласып, жасөспірімдердің бірі жүрек тұсынан пышақ жарақатын алып, өлім аузынан қалды.
Төрт мектептің білім алушылары арасындағы жанжалға не себеп болғаны әлі белгісіз. Бейбіт басына есеп айырысуға жиналғандардың бәрі бірдей құр қол келмеген көрінеді. Төбелес кезінде жасөспірімдердің біріне пышақ сұғылған, деп хабарлайды "Первый телеканал "Евразия".
Ер бала ауыр халде мектепке өз аяғымен жеткен, алайда білім ордасының басшылығы жедел жәрдем шақырып, не болғанын сұраудың орнына, оқушыны таксиге отырғызып үйіне қоя береді.
Баланың әкесі мұғалімдердің бұл қылығына ашулы.
"Ол өлген жоқ қой, неге сонша байбалам саласыз дейді. Сонда өлуі керек пе еді?", — дейді Нұрлан Теңелов.
Дәрігерлер айтқандай, оқушының жарақатты ауыр болған әрі пышақ жүрекке бір сантиметр жақын өтіпті. Ер бала қансырап жан тапсыруы мүмкін еді.
"Пышақ кәрі жілік жүйкесіне зақым келтірген. Шұғыл ота жасалды", — деп түсіндірді нейрохирург Саслан Өтегенов.
Әзірге полицияға белгілі мәлімет бойынша, төбелеске төрт мектептен қырық оқушы қатысқан. Жанжалдың себебі әлі анықталған жоқ. Бірақ төбелеске қатысқан бірнеше бала ұсталды. Олардың арасында жәбірленушіге пышақ сұқты деген күдікті де бар.
Қазір Ақтөбе полиция департаменті сотқа дейінгі тергеу амалдарын жүргізіп жатыр.