АЛМАТЫ, 11 қаңтар — Sputnik. Мәнерлеп сырғанаушы Денис Теннің өлімі туралы қорытындыны жазған сот-медициналық сарапшы Алматыда жұма күні өтіп жатқан басты сот талқылауында сөз сөйледі, деп хабарлайды Sputnik Қазақстан тілшісі.
Сарапшы Әзиз Ибрахимовтың айтуынша, спортшы пышақ жарақатынан көп қан жоғалту салдарынан көз жұмған.
"Сараптама барысында Денис Теннің екі пышақ жарақатын алғаны белгілі болды. Миы ісіп, ішкі органдарының қаназдығына ұшыраған. 17:00-де көз жұмғаны тіркелді", — деп мәлімет берді Ибрахимов.
Денис Теннің өліміне күдіктінің ағасы сотта жауап беруден бас тартты
Мұндай жарақат алған адамның тірі қалуы мүмкін бе деген адвокаттың сұрағына сарапшы "жоқ деп нақты айта алмаймын, әр адамның ағзасы әртүрлі" деп жауап берді.
"Кей жағдайда адам алғашқы минутта шок алуы мүмкін. Жәбірленушінің басынан өткен жағдайды алсақ, жарақаты салдарынан тез қан жоғалтқан", — деді Ибрахимов.
Сотта медициналық-криминалдық сараптама жүргізген маман Артем Курбангалиев жауап берді. Сарапшының айтуынша, ол мәнерлеп сырғанаушының киімдері мен тері бөліктерін қараған екен.
"Екі пышақ жарақатын алған, бірінің ұзындығы 9 сантиметр, екіншісі – 4 сантиметр", — деп мәлімет берді Курбангалиев. Алайда маман күдіктілердің Денис Тенге қалай пышақ салғаны туралы нақты айта алмады.
"Денис Теннің жарақатына қарағанда адам артынан немесе оң жағынан пышақ салған болса керек. Алайда менің пайымдауымша, алдыңғы жағынан мұндай пышақ жарақатын тек солақай адам ғана жасай алады. Ал арт жағынан оңқай адам пышақ салған болуы мүмкін", — деп атап өтті Курбангалиев.
Полицейлер күдіктілердің Денис Тенді өлтіріп жатқанын көрген
Сот отырысы барысында оқиға туралы жаңа деректер анықталуда. Үш күдікті де кінәсін мойындамайды. Жәбірленуші тарап Денис Теннің тапсырыспен өлтірілгенін алға тартады.
Денис Теннің өлімі
Денис Тен 25 жасында көлік ұрыларының қолынан ажал құшты. 2018 жылыдң 19 шілдесінде Денис Lexus көлігін Алматы орталығында тұраққа қойып, мейрамханаға кіреді. Шыққан кезде көлігінің айналарын ұрлап жатқан екі жігітті көріп, олармен қақтығысқа түскен. Ұрылардың бірі спортшының аяғына пышақ сұғып жібереді. Екі сағаттан соң Денис Тен көп қан жоғалту салдарынан ауруханада көз жұмды.