АСТАНА, 15 маусым – Sputnik. Алдағы үш айда Қазақстанның тағы үш республикалық тас жолында ақы алу жүйесі енгізіледі. Бұл туралы инвестициялар және даму министрі Жеңіс Қасымбек мәлімдеді, деп хабарлайды Sputnik Қазақстан тілшісі.
Министр қазір елімізде тек Астана-Бурабай тас жолы ғана ақылы екенін атап өтті. Айтуынша, алдағы үш айда тағы үш учаске ақылы болады.
"Алдағы үш айда үш учаскеде – 630 шақырымнан астам – ақы алу жүйесі енгізіледі. Бірінші учаске – Алматы-Қорғас, шілде айының соңында жүйе толығымен енгізіледі. Сондай-ақ Астана-Теміртау және Алматы-Қапшағай жолдары қыркүйек айында ақылы болады", — деді Қасымбек парламент палаталарының бірлескен отырысында.
Ол 2020 жылға дейін 5,5 мың шақырымды, ал 2022 жылға дейін 10 мыңнан астам шақырымды ақылы ету жоспарланып отырғанын айтты.