АСТАНА, 9 сәуір — Sputnik. Алматыда сауда және ойын-сауық орталығынан өрт шығып, ғимараттан 60 адам эвакуацияланды, оның 10-ы балалар, деп хабарлады қалалық ТЖД ресми өкілі Сандуғаш Баймұхамбетова Sputnik Қазақстан агенттігіне.
"14.34-те Алматы ТЖД "101" нөміріне Алатау ауданы Рысқұлов даңғылы, 143 "В" мекенжайында орналасқан "Домиллион" сауда орталығында өрт шыққаны туралы хабар түскен. Алғашқы өрт сөндіру жасақтары оқиға орнына сегіз минутта жетіпті. Анықталғандай, бірінші қабатта дәліздегі электр желісінде қысқаша тұйықталу болып, артынша тұтанған екен. Салдарынан 0,2 шаршы метр жер өртеніпті", — делінген хабарламада.
Естеріңізге сала кетсек, қазір Қазақстанда Кемероводағы қайғылы оқиғадан кейін сауда орталықтарында жоспардан тыс тексерулер жүргізіліп жатыр. Апта бойы тексерілген 75 нысанда да өрт қауіпсіздігі ережелері бұзылған.