Қазіргі жағдайда мұнай өңдеуге инвестиция салу экономикалық тұрғыдан тиімсіз - Бектенов
15:03 23.09.2026 (жаңартылды: 15:09 23.09.2026)
© Photo : Пресс-служба АО НК "КазМунайГаз"
Жазылу
Премьер-министрдің айтуынша, Қазақстандағы бензин мен дизель отынының бағасы көрші елдердегі бағадан екі есе төмен
АСТАНА, 23 тамыз - Sputnik. Үкімет мұнай өнімдеріне ішкі сұраныстың артуына байланысты Қазақстанда мұнайды өңдеуді тереңдету мәселесін талқылады.
Мұнай өңдеу қуаттылығын арттыру ішкі нарықтағы отын бағасының тартымдылығымен тікелей байланысты, деді премьер-министр Олжас Бектенов кеңес барысында.
"Қазақстандағы бензин мен дизель отынының бағасы көрші елдердегіден екі есе төмен болып тұрған қазіргі жағдайда мұнай өңдеу саласына инвестиция салу экономикалық тұрғыдан тиімсіз. Сондықтан біз нарықты ырықтандыру жұмыстарын белсенді түрде жалғастыруымыз қажет. Бұл – экономикалық қауіпсіздік мәселесі", – деді үкімет басшысы.
Павлодар мұнай-химия зауытының қуаттылығы 2031 жылға қарай 6 млн тоннадан 9 млн тоннаға дейін арттырылады. Атырау мұнай өңдеу зауытында тиімділікті арттыру жобасы жүзеге асырылып жатыр. 2027 жылы аяқталуы жоспарланған бұл жоба зауыт қуаттылығын 5,5 миллион тоннадан 6,1 миллион тоннаға дейін ұлғайтуға мүмкіндік береді.
"Сонымен қатар, Шымкент мұнай өңдеу зауытын жаңғырту жұмыстары "Кеңқияқ – Атырау" және "Кеңқияқ – Құмкөл" магистральдық мұнай құбырлары мен Текесу станциясының өткізу қабілетін кеңейтуді, сондай-ақ жылына 3,5 миллион тоннаға дейінгі қуаттылыққа ие "Шымкент – Алматы" мұнай өнімдері құбырын салуды қамтиды", – деп атап өтті Хасенов.
Жалпы алғанда, қолданыстағы үш мұнай өңдеу зауытында кеңейту жобаларын жүзеге асыру - олардың жиынтық қуаттылығын жылына 17,5 миллион тоннадан 28,8 миллион тоннаға дейін арттырады.
Сондай-ақ үкімет отырысында болашақта салынатын төртінші мұнай өңдеу зауыты мәселесі де талқыланды.
"Премьер-министр төртінші мұнай өңдеу зауытын салуға қатысты — оның оңтайлы қуатын, конфигурациясын, шикізат базасын, орналасатын жерін және экономикалық моделін айқындауды қоса алғанда — кешенді бағалауды аяқтап, 2026 жылдың соңына дейін түпкілікті шешім қабылдауды тапсырды", — деп хабарлады Үкіметтің баспасөз қызметі.
Энергетика министрлігінің деректеріне сәйкес, елдегі мұнай өңдеу қуаттылығына деген ұзақ мерзімді сұраныс жылына шамамен 40 миллион тоннаға жетуі мүмкін.
