Атырау мұнай өңдеу зауытында биыл 3,6 млн тонна мұнай өңдеу жоспарланып отыр
© Photo : Пресс-служба АО "НК "КазМунайГаз"
Жазылу
Атырау МӨЗ-де 17 стратегиялық және инвестициялық жоба жүзеге асырылып жатыр
АСТАНА, 19 тамыз — Sputnik. Атырау мұнай өңдеу зауыты биыл 3,6 млн тонна мұнай өңдеп, 1,2 млн тоннадан астам автобензин, 1,3 млн тоннадан астам дизель отынын және шамамен 148 мың тонна авиаотын өндіруді жоспарлап отыр, деп хабарлады "ҚазМұнайГаз" ұлттық компаниясы.
"Бүгінде жеңіл мұнай өнімдерін шығару көлемі 80%-дан, ал шикізатты өңдеу тереңдігі 90%-дан асты. Операциялық тиімділікті арттыру шараларының арқасында Атырау МӨЗ-де дизель отынын өндірудің орташа тәуліктік көлемі 2024 жылғы тәулігіне 5,5 мың тоннадан 7,1 мың тоннаға дейін өсті", - делінген хабарламада.
Ұлттық компанияның басқарма төрағасы Асхат Хасенов зауыттағы негізгі инвестициялық жобалардың іске асырылу барысымен танысты.
"Атырау МӨЗ-де 17 стратегиялық және инвестициялық жоба жүзеге асырылып жатыр. Атап айтқанда, ұзартылған жөндеуаралық кезеңге көшу аясында 47 іс-шара қарастырылған. Бұл жылдық шикізат өңдеу көлемін 5,5 млн тоннадан 6,1 млн тоннаға дейін арттыруға мүмкіндік береді. Қазіргі уақытта жобаның орындалу деңгейі – 23%", — деп атап өтті компания.
Компанияның мәліметінше, жоба технологиялық қондырғыларды үш жылдық үздіксіз жұмыс цикліне көшіруді көздейді. Сондай-ақ ол мұнайды терең өңдеу өндірісінің тұрақты жұмысын қамтамасыз етуге және жеңіл мұнай өнімдерін шығару көлемін арттыруға бағытталған.
"Сонымен қатар сыртқы электр желілерін реконструкциялау, электр беру желісін, резервтік газтурбиналық электр станциясын салу және автоматтандырылған диспетчерлік басқару жүйесін енгізу арқылы электрмен жабдықтау сенімділігін арттыру жұмыстары жүргізіліп жатыр. Бұдан бөлек, шикізатты қабылдау үшін теміржол инфрақұрылымын кеңейту қарастырылған", - деп нақтылады компания.
Зауытта шығарындыларды азайтуға бағытталған факел газдарын қайтару блогын орнату жобасы да жүзеге асырылуда. Резервуарларды понтондармен жабдықтау жұмыстары жалғасып жатыр. Бұл шаралар әр резервуардан бөлінетін көмірсутек шығарындыларын 90%-ға дейін азайтуға мүмкіндік береді.
