Бұл ретте, әлемдегі 3 ықпалды адамның баяндамасы үлкен қызығушылық тудырды.
Дональд Трамптың сөйлеген сөзінен тағы бір сайлауалды әдіс-тәсіл екені аңғарылып тұрды. АҚШ-тың сыртқы саясатының "қытайға қарсы" басым бағыты мен оның БҰҰ-ға деген көзқарасы ашық көрінді, деп жазады РИА Новости.
Америка президенті бұған дейін АҚШ БҰҰ-ны ең көп қаржыландыратын ел, ендеше ол Вашингтонға бағынышты болып қана қоймай, оның бұйрықтарын бұлжытпай орындауға міндетті екенін бірнеше мәрте мәлімдеген болатын. АҚШ-тың оған дейінгі президенттері де дәл осылай ойлағаны даусыз, бірақ Трамп бұл ұстанымды ашық айтқан және "бағынбаған" жағдайда жазалаумен қорқытқан алғашқы президент болды. Сондықтан, оның өз баяндамасын сайлау науқаны алдындағы мәселелерді шешудің бір тәсіліне айналдыруы – заңдылық.
Ресейлік БАҚ Америка президентінің Ресейді бірде-бір рет ауызға алмағанын атап өтті. Бірақ Қытай он екі рет аталған (ал АҚШ он рет қана). Яғни, "Қытайға қарсы рух" Трамп баяндамасының өзегіне айналды. Оның коронавирустың таралуына қатысты Бейжіңді жазалауға әлем елдерін шақыруы мен "Қытай вирусы" атауын пайдалануының өзі неге тұрады.
АҚШ президенті баяндамасындағы "қарсыласу сипаты" БҰҰ-ның жазылмаған ережелері мен қалыптасқан дәстүріне қайшы келеді. Бірақ Бейжің мұндай демаршты күткен секілді, оны Қытай өкілінің Америка президентінің шабуылына жедел тойтарыс беруінен де аңғаруға болатындай.
Си Цзиньпин өз баяндамасын әдеттегідей салмақты үнмен бүгінгі күннің ең өткір мәселелеріне (бірінші кезекте, әрине COVID-19-ға қарсы жаһандық күреске) арнады.
Америкалық және қытайлық әріптестері баяндамаларының жанында Ресей президентінің сөйлеген сөзі анағұрлым дәстүрлі болып көрінді: Владимир Путин қазіргі замандағы күрделі проблемалардан бастап, БҰҰ төңірегіндегі түйткілді мәселелерге дейін қамтыды. Ресейлік көшбасшы халықаралық іс-шараларға қатысу кезіндегі сөйлеу мәнерін сақтады, тіпті мәтінді телесуфлерді қолданбай, тек қағазға қарап оқып шықты.
Путин БҰҰ-ның әлемдегі стратегиялық тұрақтылықты сақтаудағы маңызына, тарихты бұрмалауға жол бермеу және қару-жараққа бақылауды сақтау қажеттілігіне, коронавирус эпидемиясымен күрестегі халықаралық күштердің рөліне, сондай-ақ, пандемияның әлеуметтік-экономикалық салдарына айрықша тоқталды.
