АСТАНА, 11 наурыз – Sputnik. Қазақстан премьер-министрінің орынбасары Жеңіс Қасымбек бастаған делегация Ташкентте үкіметаралық комиссияның 18-отырысына қатысады, деп хабарлайды Sputnik Қазақстан тілшісі.
Сыртқы істер министрлігінің ресми өкілі Айбек Смадияров осы аптада Ташкентте Қазақстан мен Өзбекстан арасындағы екіжақты ынтымақтастық жөніндегі үкіметаралық комиссия отырысы өтетінін хабарлады.
Отырыстың күн тәртібіне қос ел арасындағы тауар айналымын арттыру, ауыл шаруашылығы, су-энергетикалық, ғарыш және ақпараттық салалардағы өзара іс-қимыл, транзит-көліктік ынтымақтастық, өңіраралық және шекара маңындағы байланыстарды дамыту мәселелері кірген.
"Тараптар сондай-ақ мәдени-гуманитарлық, білім, ғылым, денсаулық сақтау және туризм салаларындағы екіжақты ынтымақтастық мәселелерін талқылайды. Отырыс барысында 2019 жылы Қазақстанның Өзбекстандағы жылын өткізу жөніндегі бірлескен іс-шаралар жоспарын қабылдау жоспарланып отыр", - деп түйіндеді сөзін Айбек Смадияров.
Айта кетейік, биыл Қазақстанның Өзбекстандағы жылы өтіп жатыр.
