АСТАНА, 12 желтоқсан – Sputnik. 2009 жылғы ескі үлгідегі жеке куәліктердің жарамдылық мерзімі келесі жылы аяқталады, сондықтан құжатты жаңа үлгідегі чипі бар куәлікке ауыстыру керек, деп хабарлайды Sputnik Қазақстан.
Осыған байланысты ішкі істер министрлігі мерзімі өткен құжатты уақытында ауыстыру туралы азаматтарды ескертеді.
"Құжатты республика аумағындағы кез-келген халыққа қызмет көрсету орталығында (бұрынғы аумақтық қағидат бойынша) ресімдеуге болады. Сонымен қатар ескі үлгідегі құжатты жаңаға айырбастауды (әзірлеудің жаңа технологиясына сәйкес өзгертілді) ХҚКО-на бармастан жүзеге асыруға болады, ол үшін "электронды үкімет" порталы арқылы сұрау жіберу қажет (3,5х4,5 см. цифрлі фото сурет пен сканерленген жеке қолы графикалық файл түрінде электронды сауалхатпен бірге жолданады)", — деп хабарлайды ІІМ баспасөз қызметі.
Қолайлы болу үшін жеке куәліктің жарамдылық мерзімінің аяқталуына дейін бір ай қалғанда жаңа құжатты ресімдеуге болады.
