АСТАНА, 23 қараша — Sputnik. Қазақстандық әнші Димаш Құдайберген "Әлем аруы-2018" байқауында ән орындайды. Бұл туралы ол өзінің Instagram парақшасында жазды.
"Сіздермен "Әлем аруы-2018" байқауында көрісетін боламыз. 8 желтоқсан күні "Әлем аруы" байқауында ән шырқаймын. Жолыққанша!" — деп жазды Құдайберген.
Әншінің қандай ән орындайтыны туралы ақпарат "Әлем аруы" байқауының Instagram желісіндегі парақшасында жазылған.
"Әлем аруының" финалы Димаштың ән айтатынымен ерекшелене түспек! Қазақстандық әнші "Ұмытылмас күн" әнін орындайтын болады. Бұл — Димаштың өзінің композиторлық туындыларының бірі", — деп хабарлады Қазақстандағы ұйымдастырушылар.
"Әлем аруы-2018" байқауының финалы Қытайдың Санья қаласындағы Хайнань аралында 8 желтоқсан күні өтеді.
Жуырда байқаудың ресми парақшасында онлайн дауыс беру басталды.
Бұл жолы "Әлем аруы" байқауында Қазақстанның намысын қарағандылық Екатерина Дворецкая қорғайды.
