АСТАНА, 6 қазан — Sputnik. Отандық актриса Самал Еслямова Антальяда өткен 55-ші халықаралық кинофестивальде "Үздік актриса" номинациясын жеңіп алды.
"Анадола" агенттігінің хабарлауынша, бұл жолы марапаттау рәсімін 34 мың көрермен тамашалады. Қазақстандық актриса жүлдені "Айка" әлеуметтік драмасында Қырғызстаннан Ресейге барған эмигранттың рөлін сомдағаны үшін алды.
Биыл фестивальде 10 картина таныстырылды, олардың екеуі түркиялық кинематографистерге тиесілі. "Үздік фильм" аталымын ирандық режиссер Джафар Панахидің "Үш бейне/ Three Faces" туындысы жеңіп алды. Режиссер үй қамақта отырғандықтан, жүлдені оның қызы иеленді.
Ал "Үздік актер" аталымы "Капернаум" туындысында ойнаған Заин аль-Рафеаға бұйырды. Биыл жапониялық Хирокадзу Корээда "Дүкен тонаушылар" фильмі үшін үздік режиссер атанды.
Әріптесі: Самал Еслямова марапатты ресейлік актриса ретінде алды
Марапатты америкалық киноактер Эрик Робертс табыстады. Сөз сөйлеу барысында ол фестивальге қатысу өзі үшін мәртебе болып отырғанын жеткізді. Фестиваль 29 қыркүйек пен 5 қазан аралығында өтті.
Қазақстандық актриса Самал Еслямова биыл Канн кинофестивалінде жүлде алған-ды. Әділқазы алқалары оның "Айка" фильміндегі рөлін үздік деп таныды.
