АСТАНА, 12 мамыр – Sputnik. Полицейлер үйсіз мысықты тауып, паналатты, деп хабарлайды Павлодар облысы ішкі істер департаменті баспасөз қызметі.
Ағаш басына шығып алған мысықты қалалық полицейлер байқап қалыпты. Тәртіп сақшыларының бірі ағашқа өрмелеп, мысықты түсіріп алды. Мяулап, әбден тоңып қалған жануарды бөлімшеге әкеліп жылытып, жылы сүт берген.
"Мысық жаңа үйіне үйренген соң, оған алғашқы жедел тапсырма берілді – тышқандардың бәрін аулау. Кейінірек анықталғандай, құтқарылған жануар сүйкімді ғана емес, мейірімді, мінезі жұмсақ, кез келген жанды баурап алады екен", — дейді құтқарушылар.
Полиция атап өткендей, бұл әрекетімен тәртіп сақшылары сұмдық қылмысты ашпаса да, панасыз жануарды бауырларына басып, қайырымдылық жасады.
