АСТАНА, 10 сәуір — Sputnik. Атлантада белгісіз біреу, алдын ала болжам бойынша, түнгі клубтан қонақ үйге қайтып келе жатқан америкалық боксшы Флойд Мейвезердің кортежіне оқ жаудырды.
Атланта полициясының өкілі Дональд Ханнаның айтуынша, оқ атқан адам автокөлікте болған, ол боксшының кортежін біраз уақытқа дейін қуған көрінеді.
Қуғыншыдан құтылған үш көлік Грэди мемориальдық ауруханасына барған, онда аяғынан жарақат алған күзетшілердің біріне медициналық көмек көрсетілді, деп жазды, жергілікті Atlanta Patch басылымы.
Аты аталмаған зардап шегушінің жағдайы тұрақты.
Мейвезерге қарай оқ атылған-атылмағаны белгісіз, дегенмен полиция бұл оқыс оқиға емес екенін атап өтті.
Америкалық боксшы кіші Флойд Мейвезер өз карьерасында 50 жекпе-жек өткізіп, бәрінде жеңіске жеткен.
