АСТАНА, 19 наурыз – Sputnik. "Қазгидромет" РМК көктемнің сәуір және маусым айларындағы ауа райына болжам жасады, деп хабарлайды Sputnik Қазақстан тілшісі.
Ұзақ мерзімді ауа райы болжамы басқармасының басшысы Гүлмира Ақышеваның айтуынш, сәуірде күн жылы әрі жауын-шашынды болады.
"Сәуір айы жылы әрі жауын-шашынды болады деп болжанып отыр. Әсіресе бұл айдың бірінші және үшінші онкүндігінде жиі байқалады. Бұл айда суық және жылы күндер алма-кезек ауысуына байланысты ауа райы құбылады. Ең төменгі температура бірінші онкүндіктің соңына қарай байқалады", — деді Ақышева ОКҚ-де өткен баспасөз мәслихатында.
Синоптиктердің болжамынша, бірінші онкүндіктің соңында солтүстікте, орталықта және шығыста сынап бағанасы түнде —5…-15 градусқа дейін төмендеп, күндіз 0..5 градусқа дейін жоғарылайды. Республиканың оңтүстігі мен оңтүстік-шығысында ауа температурасы түнде 0…5 градус, күндіз +5…+10 градус аралығында.
Ақышева болжамға сәйкес сәуірдің екінші және үшінші онкүндігінде Орта Азиядан ығысатын оңтүстік-батыс ағымдардың әсерінен күн жылып, ал оңтүстікте ыстық болатынын атап өтті.
"Сынап бағанасы күндіз солтүстік өңірлерде +15…+23 градус, оңтүстік аймақтарда +20…+28 градусқа дейін көтеріледі. Сәуір айында ауа райы "алдамшы" болғандықтан, жылы күндер ұзаққа созылмайды. Өйткені үшінші онкүндіктің басында және соңына қарай күн суыта түседі. Еліміздің солтүстік аймақтарында жауын-шашын түсіп, түнде ауа температурасы нөлден төмен, күндіз +5..+15 градус жылы болады. Оңтүстікте күн күркіреп, өткінші жаңбыр жауады", — деді басқарма басшысы.
Ал мамыр айы жылы және жаңбырлы болмақ. Тек оңтүстік-батыста, оңтүстікте және орталықта жауын-шашын нормадан аз түседі деп болжанып отыр.
