АСТАНА, 29 қаңтар – Sputnik. Шымкенттің 18-ші шағын ауданындағы тойхана өртеніп кетті, деп хабарлайды Otyrar.kz.
Өрт шыққан аумақтағы адамдар қауіпсіз жерге көшірілді. Сол ғимаратқа жақын орналасқан құрылыс дүкенін де жалын шарпыған. Одан бөлек 5 дүкен мен 1 дәмхана, 1 ломбард және 1 емдеу мекемесінен адамдар қауіпсіз жерге шығарылды. Аталған нысандар да өрт шыққан нысанға жапсарлас орналасқан.
Облыстық төтенше жағдайлар департаментінің бастығы Нұрболат Дербісовтың айтуынша, өрт "Алтын ана" тойханасының шатырынан шыққан.
Облыстық ТЖД таратқан хабарламада: "2018 жылы 28 қаңтарда сағат 15:13-те Шымкент қаласында Рысқұлов көшесінің бойында орналасқан "Алтын Ана" тойханасының төбесі және оған жапсарлас салынған бір қабатты ғимарат өртенді. Жалын ауданы 545 шаршы метрді шарпыды. Оны өшіруге төтенше жағдайлар қызметінің 76 өрт сөндірушісі мен 10 арнайы техникасы жұмылдырылды. Өрт сағат 17:08-де толық сөндірілді", — деп жазылған.
