АСТАНА, 15 қаңтар — Sputnik. Астанада ең сұранысқа ие "Шұбаркөл" көмірінің бағасы 1000 теңгеге өсті, деп хабарлайды Астана әкімдігінің ресми сайты.
Жыл басынан бері Астана қаласына 320 мың тонна қатты отын жеткізілген.
"Әкімдіктің бұқаралық ақпарат құралдарында, әлеуметтік желілердегі ақпараттандыру жұмыстарының нәтижесінде қала тұрғындары көмірді сатушылардан тікелей қолжетімді бағада алып жатыр", — деп хабарлады әкімдік.
Ең сұранысқа ие – "Шұбаркөл" көмірі. Өткен жылдың желтоқсан айында жеткізу құнын қоспағанда бір тоннасы 11 500 теңге болған.
"2018 жылдың 4 қаңтарынан бастап бұл көмір түрінің тауар биржасындағы саудалану құнының көтерілуіне байланысты бағасы 1000 теңгеге өскен.Оған ЖЖМ-дың, теміржол вагондарының станциядан тұйыққа жеткізу құнының өсуі себеп болды", — деп түсіндірді әкімдіктегілер.
Естеріңізге сала кетейік, қала бойынша 15 көмір сату бекеті жұмыс істеп тұр, соның жетеуі ірі бекет. Сонымен қатар, қалада куммуналдық қажеттілікті қамтамасыз етуге арналған көмірді қабылдайтын 20 жүк бекеті жұмыс істейді.
