АСТАНА, 24 желтоқсан – Sputnik. Келесі жылы ҚР Энергетика министрлігі полиэтилен пакеттерді дүкендерде тегін беруге тыйым салу мақсатында заңға өзгерістер енгізбек. Астана билігі қала тұрғындарын қазірден бастап полиэтилен пакеттен бас тартуға шақырып отыр. Бұл туралы елорда әкімдігінің медиа орталығы хабарлады.
Мамандардың айтуынша, орта есеппен полиэтилен пакеттер 20 минут пайдалынылады, бұл ретте олардың ыдырау уақыты 100 жылдан 500 жылға дейінгі мерзімді қамтиды. Қазіргі күнге 40-қа жуық елде (Еуропалық одақ елдері, Аустралия, Сингапур, Бангладеш және басқа да) полиэтилен пакеттердің айналымын төмендеткен немесе қолдануға тыйым салған.
"Бұл мәселені эко-пакеттерді (қағаз пакеттер, биоыдырағыш пакеттер, матадан жасалған бірнеше реттік сөмкелер) қолдану арқылы шешуге болады… Бұған қоса 2018 жылы ҚР Энергетика министрлігі полиэтилен пакеттерді тегін беруге тыйым салу бойынша еліміздің қолданыстағы заңнамасына өзгерістер енгізеді", — делінген науқанның ұйымдастырушылары таратқан хабарламада.
