АСТАНА, 20 желтоқсан — Sputnik. Алматы облысында 26 жастағы шопанның мәйіті табылды, полицейлер кісі өлімін ашты, деп хабарлайды облыстық ішкі істер департаментінің баспасөз қызметі.
17 желтоқсан күні шалғайдағы фермалардың бірінің маңайынан пышақталған ер адамның мәйіті табылды.
Шаруа қожалығының иесі мәйітті танып, ол малшы болып жұмыс істегенін растады.
Бірнеше сағаттың ішінде полицейлер күдіктіні анықтады, ол 57 жастағы жергілікті тұрғын болып шықты.
"Күдікті жасырынған жоқ, ауыл учаскелік инспекторына өзі берілді. Ұсталған азамат оқиғаның қалай болғанын айтып берді. Ол шопанмен бірге ішімдік ішкенін, араларында жанжал шығып, оны өлтіргенін мойындады", — деп хабарлады облыстық полиция.
ҚР ҚК 99-бабы (Кісі өлтіру) бойынша қылмыстық іс қозғалды.
