АСТАНА, 19 желтоқсан — Sputnik. Алматыда кеңселердің бірінде бомба бар деп жалған ақпарат таратқан адам ұсталды, деп хабарлайды Алматы ІІД ресми өкілі Салтанат Әзірбек.
Сейсенбі күні күндіз Төле би және Байтұрсынов көшелерінің қиылысында орналасқан кеңселердің бірінің "миналанғаны" туралы хабар шыққан. Тексеру барысында ешқандай бомба табылмады.
"Жедел бөлімше өкілдері қысқа уақыт аралығында хабар таратушыны анықтап, құрықтады. Жедел іздестіру нәтижесінде Оңтүстік Қазақстан облысының 1995 жылы туған тұрғыны ұсталды, өзі жұмыссыз, бұзақылық ниетпен жалған мәлімет таратқан", — дейді Салтанат Әзірбек.
Аталған дерек бойынша сотқа дейінгі тергеу амалдары жүргізілуде. Қылмыстық кодекс бойынша мұндай қылмыс үшін алты жылға бас бостандығынан айырылуы мүмкін.
