АСТАНА, 15 желтоқсан – Sputnik. Ел Тәуелсіздігі қарсаңында Шымкент қаласының тұрғындарына тамаша тарту жасалды. Қуанышқа бөленген қаладағы 558 отбасы бүгін қоныс тойын тойлап жатыр, деп хабарлады ОҚО әкімінің баспасөз қызметі.
Нұрсат шағын ауданында бой көтерген көпқабатты 11 тұрғын үй "Нұрлы жер" тұрғын үй құрылысы бағдарламасының екінші бағыты бойынша салынған. Жалпы 31,5 мың шаршы метр болатын үйлердегі 558 баспана кілті Тұрғын үй құрылыс жинақ банкінің салымшылары мен жергілікті атқарушы органда кезекте тұрған азаматтарға берілді.
Әкімшілік-іскерлік орталығында пайдалануға берілген 9 қабатты 48 пәтерлі екі тұрғын үйдегі баспана кілтін Оңтүстік Қазақстан облысының әкімі Ж.Түймебаев, облыстық мәслихатының хатшысы Қ.Балабиев, Шымкент қаласының әкімі Н.Сауранбаев және қалалық мәслихатының хатшысы Н.Бекназаров арнайы табыстап, барша тұрғындарды жаңа қоныспен құттықтады.
Сондай-ақ, Жансейіт Қансейітұлы баспаналы болған тұрғындарға балаларының атынан бір-бір ағаштан отырғызып, соны күтіп баптауды ұсынды.
Жалпы 2017 жылы барлық қаржыландыру көздері арқылы облыста 279 тұрғын үйдің құрылысы жүргізілуде. Ол жалпы шаршы метрі 995,7 мың болатын 14 694 пәтер. Жыл соңына дейін аталған үйлердің 109-ның яғни 5893 пәтердің құрылысын аяқтап, пайдалануға тапсыру жоспарланып отыр.
2017 жылдың 11 айының қорытындысы бойынша облыстағы жалпы жеке және көпқабатты 547,1 мың ш.м. тұрғын үй пайдалануға берілді, өткен жылдың осы мерзімімен салыстырғанда 4,1 пайызға ұлғайған.
