АСТАНА, 14 желтоқсан — Sputnik. Астана қаласы Есіл ауданының №2 соты "Еуразиялық банк" АҚ елордалық филиалының бұрынғы директоры Мұрат Мұқановқа, сондай-ақ осы филалдың бұрынғы касса меңгерушісі Ақмарал Меңдалиеваға қатысты үкім шығарды, деп хабарлайды Sputnik Қазақстан тілшісі.
Мұқанов өзгенің мүлкін қасақана жойды немесе бүлдірді, сеніп тапсырылған мүлікті иеленді және талан-таражға салды деп айыпталды.
Ақмарал Меңдалиеваға заңсыз іске араласты және сеніп тапсырылған мүлікті иеленді және талан-таражға салды деген айып тағылды.
"Сот үкім шығарды: Мұрат Мұқанов кінәлі деп танылды. Оған 10 жылға бас бостандығынан айыру түрінде жаза белгіленіп, 7 жылға қаржы және банк саласында жұмыс істеу құқығынан айырылсын, жазасын орта қауіпсіздіктегі мекемеде өтесін", — деп үкімді оқыды судья Қанат Тобағалиұлы.
Ақмарал Меңдалиева жеті жылға сотталды. Ол сот залында қамауға алынды.
Сондай-ақ сот "Еуразиялық банк" АҚ-ның сотталушылардан 1 миллиард 848 миллион 394 мың 970 теңге көлеміндегі материалдық шығынды өндіру туралы азаматтық талап арызын жарым-жартылай қанағаттандырды.
