АСТАНА, 12 желтоқсан — Sputnik. Оңтүстік Қазақстан облысында Тәуелсіздік күні мерекесіне тарту ретінде халық игілігіне 5 қабатты жаңа 8 тұрғын үй пайдалануға тапсырылды. Жаңа пәтерлердің кілті "Нұрлы жер" бағдарламасы бойынша төлебилік 480 отбасыға берілді, деп хабарлады облыс әкімінің баспасөз қызметі.
Тұрғындарды арнайы мерекемен құттықтай келген Оңтүстік Қазақстан облысының әкімі Ж.Түймебаев пәтер кілттерін жетім және ата-анасының қамқорлығынсыз қалған балаларға, әскери және бюджеттік мекеме қызметкерлері мен әлеуметтік аз қамтылған отбасыларға салтанатты түрде табыс етті.
"Біздің басты міндетіміз — халықтың әлеуметтік жағдайын жақсартып, сапалы қызмет көрсету. Облыс, аудан орталықтарында, елді мекендерде тұрғын үйлер салынып жатыр. Соның бір дәлелі — бүгін Сіздердің аудандарыңыздағы 8 көп қабатты тұрғын үйдің құрылысы аяқталып, 480 отбасы баспанамен қамтамасыз етіліп, қуанышқа бөленіп отыр. Бұл бағыттағы жұмыстар барлық елді мекендерде Елбасымыздың "Нұрлы жер" бағдарламасы аясында және жергілікті, облыстық бюджет есептерінен жалғасын таба бермек", — деді әкім.
Төле би ауданы тұрғын үйлердің құрылысына 2016-2017 жылдары облыстық бюджеттен 2 миллард 735 миллион 406 мың 084 теңге қаралып, бүгінде толығымен игеріліп отыр. Нәтижесінде 29 264 шаршы метр тұрғын үй ел игілігіне берілді.
Қазіргі таңда коммуналдық тұрғын үй кезегінде ауданда жалпы 2961 адам кезекке тіркелген. Олардың ішінде 1676 адам халықтың әлеуметтік жағынан әлсіз топтағы, 345 азамат жетім және ата-ана қамқорлығынсыз қалған балалар тізімінде болса, 940-ы мемлекеттік пен бюджеттік қызметкерлер тізімінде тұр.
