АСТАНА, 29 қараша – Sputnik. Шығыс Қазақстан облысының әкімі Даниал Ахметов Семей қаласы облыс орталығы болады деген сөз жай сыбыс екенін айтты, деп хабарлайды Sputnik Қазақстан тілшісі.
Биыл жазда әлеуметтік желілерде Өскемен мен Семей қалаларының мәртебесі өзгереді деген сыбыс тараған болатын. Онда Семей қаласы облыс орталығы, ал Өскемен өндірістік орталық болады делінген.
"Семейге қатысты айтсам, бұл жай сөз", — деді әкім.
Ахметовтің айтуынша, кей кездері адамдар белгісіз біреулердің жалпы айтқан сөздерін тұтас бір пікірге балап жатады. Ал бұл дұрыс емес.
"Мәслен, бірнеше ақсақал жүгініп, қайтадан Семей облысын құру бастамасын көтерді. Бірақ, мұның экономикалық жағынан да еш қажеттілігі жоқ",- деді ол.
