АСТАНА, 9 қараша — Sputnik. Алматы әкімі Бауыржан Байбек міндетіне салақтықпен қарайтын полицейлермен қалай күресу қажеттігін айтып, ұсақ тәртіп бұзушылық үшін де жазалау керектігін алға тартты.
Астанада өткен брифинг барысында Байбектің берген мәліметінше, Алматыда 100 мың бақылау камерасы орнатылған, ал жергілікті полиция қызметінің техникалық жарақтандырылуына 1 миллиард теңге бөлініпті.
"Әр полицейдің видеорегистраторы бар, оны сөндіріп қойса, бірден жұмыстан шығару керек деп ойлаймыз. Кейбіреулер батареясы отырып қалды, сынып қалды деп сылтауратып, камераны өшіріп, пара алады. Біз "видеорегистраторды өшірсе, жемқорлыққа жағдай туады, демек арыз жазып, жұмыстан кетуі тиіс" деп санаймыз. Осылайша күресу керек, басқа жол жоқ", — дейді әкім.
Сонымен бірге қала әкімі ұсақ құқық бұзушылық үшін жазалау мәселесі туралы да сөз қозғады.
"Халықаралық тәжірибе көрсеткендей: отыратын орындықты бүлдіріп, терезе шақса — жазаламасақ, одан да зорғысын істесе де — жазаламасақ, ауыр қылмыстарға жол ашамыз. Сондықтан да ұсақ құқық бұзушылық үшін бірден жазалап отыру керек, осылай ғана халықты демократияға, заңды орындап, өзге азаматтардың құқығын құрметтеуге үйретеміз. Мұның басқа амалы жоқ", — деп ойын түйіндеді Байбек.
