АСТАНА, 10 қазан – Sputnik. Премьер-министр Бақытжан Сағынтаев елімізде бензин тапшылығына қатысты жағдайға жауапты бірқатар лауазымды тұлғаны қызметінен босатып, сөгіс жариялады.
Бақытжан Сағынтаев ең алдымен елдегі бензин тапшылығына қатысты жағдай бойынша негізгі баяндамашыларды тыңдады. Бірақ үкімет басшысының олардың жауабына көңілі толмады.
"Бітпейтін сылтау. Мен мұнымен келіспеймін. Бұл жағдайды тікелей өз лауазымдық міндеттеріңді орындамау деп есептеймін. Жауапкершілік болу керек. Сондықтан мен келесідей шешім қабылдаймын. Үкімет мүшелеріне қатысты әкімшілік жауаптылық жөнінде шешімді Президент қабылдайтындықтан, мен Мемлекет басшысының атына Энергетика министрі Қанат Бозымбаевқа сөгіс жариялау туралы ұсыныс енгіземін", — деді Сағынтаев.
Үкімет басшысының келесі шешімі Энергетика вице-министрі Әсет Мағауовқа қатысты болды.
"Вице-министрлерге қатысты шешімді мен өзім қабылдаймын Сондықтан Энергетика вице-министрі Әсет Мағауовты қызметінен босату туралы шешім қабылдаймын. Кеңсе бүгін тиісті үкімет шешімін дайындасын", — деді премьер.
