АСТАНА, 8 қазан– Sputnik. Ішімдікке сылқия тойып алған қыз Үштөбе қонақ үйлерінің бірінде полицейлердің бетін тырнап, погондарын жұлып тастады, деп хабарлайды Алматы облысы ішкі істер департаментінің баспасөз қызметі.
ІІД ақпаратына сәйкес 26 жастағы қызға қатысты қылмыстық кодекстің 380-бабы "билік өкіліне күш қолдану" бойынша қылмыстық іс көзделген.
Бұл оқиғаның Үштөбедегі қонақ үйлердің бірінде болғаны белгілі болды. Оқиға орнына келген полицейлер қонақ үйде жұрттың мазасын алып, шу шығарған мас әйел мен ер адамды ұстайды.
"Әйел адам патрульдік полицейлердің біріне жұдырық ала жөнеледі. Оның формасындағы погондарды жұлып тастайды, полицейге түрлі заттарды лақтырып, бетін тырнап тастайды. Ұсталған екеуі медициналық айықтырғышқа жеткізіледі. Одан кейін жауап алу үшін Қаратал аудандық ішкі істер бөліміне жеткізілді", — деді облыстық полициядағылар.
Әзірге тек әйел ғана қылмыстық жауапкершілікке тартылады. Өйткені оның жанында болған ер адам мас болса да, өзін сабырлы ұстап, полицейлерге тап бермеген.
Полиция ақпараты бойынша әйел адам бұған дейін де қылмыстық жауапкершілікке тартылып, сот тағайындаған шартты түрдегі жазаны өтеп болмаған.
