АСТАНА, 20 қыркүйек - Sputnik. Қазақстан мен Өзбекстанның ірі қалалары арасында тұрақты автобус бағдарлары биылғы жылдың соңына дейін ашылады, деп хабарлады ҚР Инвестициялар және даму министрі Жеңіс Қасымбек.
Бүгін Мәжілістің жалпы отырысында Қазақстан мен Өзбекстанның үкіметтері арасында жасалған халықаралық автомобиль қатынасы туралы келісімге өзгерістер енгізу туралы хаттаманы ратификациялау мәселесі қаралды.
Жеңіс Қасымбек атап өткендей, қазіргі уақытта Қазақстан мен Өзбекстан арасында жолаушылар тасымалы бойынша тұрақты автобус бағдарлары жоқ. Бұл шекараны өту кезінде қолайсыз жағдайлар тудырады.
"Хаттамаға сәйкес автомобиль көлігімен жолаушыларды тұрақты, тұрақсыз және транзиттік тасымалдау үшін құқықтық норма бекітіледі. Хаттама күшіне енген соң екі елдің ірі қалаларының арасында тұрақты автобус бағдарлары ашылатын болады. Біздің жоспарымыз бойынша алғашқы автобус бағдары биылғы жылдың соңына дейін іске қосылады", — деді министр.
Оның айтуынша, бұл хаттама екі елдің арасындағы сауда-экономикалық байланысты одан әрі дамытуға және халықтың екіжақты байланысын нығайтуға оң ықпал етеді.
