АСТАНА, 3 қыркүйек — Sputnik. Астанада "Абу-Даби Плаза" кешенінің құрылыс алаңында орын алған жаппай төбелестен кейін бір топ адамдар жағдайды тұрақсыздандыруға тырысты, деп хабарлайды астаналық ішкі істер департаменті.
2 қыркүйек күні кешке "Абу-Даби Плаза" құрылыс алаңының бақылау-өткізу пунктінде күзет компаниясының қызметкерлері мен шетелдік жұмысшылар, Үндістан азаматтары арасында қақтығыс туындады. Полиция бірден құрылыс маңындағы көшелері жауып тастады. Жаппай төбелес салдарынан екі азамат жарақат алып, ауруханаға жеткізілді.
Хабарламада: "Алайда бірқатар азаматтар, қоғамдық тәртіпті бұзып, жағдайды ұшықтыруға тырысты. "Есіл" ауданы прокуроры қоғамдық тәртіпті бұзуға қатысты әкімшілік жауапкершілік туралы ресми мәлімдеме жасады. Мұндай ескертуге қарамастан азаматтар, құқық қорғау органдарының заң жүзіндегі талаптарына қарамай, қоғамдық тәртіп бұзуды жалғастыра берді", — делінеді.
Құқық бұзушылар тобы жеке анықтамалар жасау мақсатында полицияға жеткізілді. 8 адамға қатысты әкімшілік сипаттағы шаралар қабылданып, материалдары әкімшілік сотқа жөнелтілді. Қалғандары профилактикалық әңгімелесуден кейін босатылды.
Жалған ақпарат таратқаны үшін қылмыстық жауапкершілікке тартылу шарасы орын алатынын ескертіп, полиция азаматтарды жалған ақпараттарды таратпауға шақырды.
