АСТАНА, 19 шілде — Sputnik. Үйде жалғыз қалған жеті жасар қыз бала Астанадағы көп қабатты тұрғын үйдің тоғызыншы қабатынан құлап кете жаздады, деп хабарлады елордалық төтенше жағдайлар жөніндегі департаменттің өрт сөндіру және апаттық-құтқару жұмыстары қызметі.
18 шілде күні кешкісін құтқарушыларға келіп түскен хабарлама бойынша, кішкентай қыз тоғызыншы қабатта ашық тұрған терезе жақтауына асылып тұрған. Оқиға орнына келіп жеткен құтқарушылар Сейфуллин көшесі бойындағы он төрт қабатты "Верный" тұрғын үй кешенінің тоғызыншы қабатында кішкентай қыздың терезе жақтауына шығып тұрғанын көріпті.
Альпинист жабдықтарының көмегімен сатылы арқан мен түсіруге арналған қауіпсіздік арқаны әзірленген. Құтқарушы пәтерге кіріп, үйде жалғыз қалған 2010 жылы туған қызды жұбатыпты. Ата-анасы келгенше, құтқарушылар қыздың қасында болған.
