АСТАНА, 1 маусым — Sputnik. Талдықорған полицейлері мотоциклшіні қағып, оқиға орнынан қашып кеткен Audi жүргізушісін ұстады, деп хабарлады Алматы облысы ішкі істер департаменті баспасөз қызметі.
30 мамыр күні кешке Талдықорған көшелерінің бірінде Audi қарама-қарсы келе жатқан Suzuki мотоциклімен соқтығысқан. Соқтығысу салдарынан 32 жастағы мотоциклші әртүрлі жарақатпен облыстық ауруханаға жатқызылды, ал жүргізуші жол апаты орнынан қашып кетті.
Жедел іздеу шаралары нәтижесінде қашып кеткен жүргізуші табылып, ұсталды, ол 1988 жылы туған жергілікті тұрғын екен. Полицияға жеткізілген ер адам кінәсін мойындап, түсініктеме берді.
Тиісті сараптамалар тағайындалған. Жәбірленушінің денсаулығына ауыр зиян келтіргені үшін жүргізушіге 2 мың АЕК айыппұл салынып, тіпті екі жылға бас бостандығынан айыру жазасы қолданылуы мүмкін.
